laugardagur, 12. febrúar 2005

Á flestum vinnustöðum þar sem konur eru í miklum minnuhluta virðast karlmenn leitast við að bæta upp fjarveru þeirra með þvi að vera duglegir að segja sem klúrastar reynslusögur af sjálfum sjer og ótilgreindum kvenpersónum. Hommar þykja síðasta sort, en lessur eru bara eitthvað sem flestir þeirra telja sig geta umsnúið með velútfærðum æfingum á dýnu. Ljenzherranum þykir nokkuð skondið að hugsa til baka og íhuga hvernig viðhorf hans til svona sagna hafa breyst með hverju árinu sem líður. Er hann var ungur og óharðnaður hlustaði hann á þessar sögur með mikilli aðdáun og fannst til að mynda hann Siggi alveg ótrúlega töff að hafa sofið hjá öllum þessum konum á ekki lengri tíma, og velti því mikið fyrir sjálfum sjer hvernig hann gæti aukið afköst sjálfs sín á þessu sviði, sem voru satt að segja ekki mikið til að tala um.
Síðar fór athygli Ljenzherrans meira að beinast að því ósamræmi sem gætti í bókhaldi Sigga og eftir að hafa heyrt að minnsta kosti þrjár mismunandi aflatölur frá metsumrinu áttatíuogfjögur var Siggi ekki lengur sami töffarinn og áður, heldur brjóstumkennanlegur rugludallur sem þurfti að finna sjer einhvern annan til að hlusta á sig.
Í gær fór Ljenzherrann í vísindaferð til fyrirtækisins sem hann hefir unnið hjá í fimm sumur. Verkfræðinemum var boðið upp í Grundartangadans þar sem þeir fengu að sjá álver í uppbyggingu. Í ljósi margra ára starfsreynslu sinnar hjá þessu fyrirtæki sá Ljenzherrann mörgum kunnuglegum andlitum bregða fyrir. Öryggisráðstafanir voru miklar og öllum var úthlutað öryggishjálmum sem uppfylltu viðeigandi Evrópustaðla. Enginn annar en Ljenzherrann vissi hinsvegar að maðurinn sem útbýtti hjálmunum hafði eitt sinn sagt Ljenzherranum það í óspurðum frjettum að kynfærahár afrískra blökkukvenna væru ekki ósvipuð frönskum rennilás og að í eina tíð hefðu hollenskar vændiskonur prufað fyrir kynsjúkdómum á viðskiptavinum sínum með því að kreista á þeim rörið. Þessvegna tók Ljenzherrann sinn hjálm sjálfur úr kassanum, í stað þess að láta gamla dónakallinn rjetta sjer hann.

Engin ummæli: