þriðjudagur, 11. maí 2004

Liðamótalausi-Ljenzherrann og Wachowsky-bræður.
Það er ekki á allra vitorði að Ljenzherrann af Kaffisterkt sleit nokkrum pörum af barnaskóm í þeirri malbikuðu menningareyðimörk sem Asparfellið í Breiðholti er. Einungis fjögurra ára hafði hann lært sjálfur að lesa veggjakrot og kemur þaðan talsmátinn og málfræðin.

Er Ljenzherrann var sex ára þótti "New kids on the Block" ágætis hljómsveit og öll börn söfnuðu "garbidspalkids" svokölluðu. Ljenzherrann iðkaði hinsvegar skotbolta öllum stundum og stóð honum enginn á sporði í þeirri íþrótt.

Jafnvel þó Ljenzherrann sje eigi fordómagjarn, sýndi hann mikla kynþáttamismunun í garð brenniboltannna sem brúkaðir voru við þennan leik. Voru tvær gerðir í boði, "000000" og "111111". Ljenzherrann vildi ekki fyrir sitt litla líf sjá "111111", en þrumaði "000000" í leikfjelaga sína með ánægju og kartöflum.

Í skjóli afreka sinna í skotbolta ríkti Ljenzherrann yfir lyklabörnunum í Asparfellinu, eins og kóngur í ríki sínu. Hann skipaði þeim til og frá og þeir sem þóknuðust eigi hinum mikla herra var gerð sú skömm að vera grýttir með "111111" brenniboltum og áttu sjer yfirleitt ekki uppreisn æru eftir það.

Mikillar gremju var farið að gæta í Asparfellinu í garð Ljenzherrans því hann þótti afar montinn. Það kom svo til einn daginn að gerð var uppreisn. Í forystu uppreisnarmanna fóru þeir Andri og Lárus Valgeirssynir, en báða þeirra hafði Ljenzherrann grýtt úr mannlegu samfjelagi. Söfnuðu þeir miklu liði og miklu af brenniboltum til hernaðarlegra nota.

Loftið var lævi blandið og þegar Ljenzherrann kom út til að ráðskast með lyklabörnin mætti hann hersingunni. Andri Valgeirsson stóð í broddi fylkingar og mundaði "111111" brennibolta sem greinilega var ætlaður Ljenzherranum. Andri tjáir Ljenzherranum að verði að láta af ofríki sínu og honum beri að gefast upp, það sje ómögulegt að sigra.

"Ómögulegt er orð fyrir flón!! þú hefir óhlýðnast mjer í síðasta skipti, Andri Valgeirsson!!" -Öskrar Ljenzherrann.

"Árás!!!!!!!" -Öskrar Andri Valgeirsson, og boltaregnið dynur á Ljenzherranum.

Ljenzherrann nær samt með ótrúlegum hætti að skjóta sjer undan öllum boltum, rjett eins og hann hafi verið úr gúmi. Andri Valgeirsson grenjar af bræði og þrumar boltanum sínum að Ljenzherranum, Ljenzherrann grípur og þrumar honum fast til baka. Boltinn smellur svo rækilega í enninu á Andra Valgeirssyni að þar sjest enn þann dag í dag 111111, ef vel er að gáð. Ljenzherrann hlaut aftur á móti viðurnefnið Liðamótalausi-Ljenzherrann og fór hróður hans í Asparfellinu síst minnkandi eftir þetta.

Andri og Lárus áttu hinsvegar erfitt uppdráttar á Íslandi eftir þetta og gerðu víðreist til Amríku. Sjer til virðingarauka breyttu þeir nöfnum sínum yfir í Andy og Larry Wachowski og fóru að gera kvikmyndir.

Engin ummæli: