laugardagur, 21. apríl 2007

Ljenzherrann hefir í dag tekið mörg skref til þróunar. Ljenzherrann vaknaði í fósturstellingunni og leið eins og líkamninn hefði bæði hafnað kviðarholslíffærum og heiabúi, upp úr þrjú megnaði hann að velta sjer á bakið, klukkan fimm settist hann og í kringum kveldmatarleytið gat hann skakklappast óstyrkum og varfærnum skrefum um íbúðina.
Ljenzherrann var þó mun hressari í gærkveldi þar sem hann þambaði mjöð á írskum rökkbar hjer í Zurich og ræddi menn og málefni. Þegar spurðist út að fagnaðarhrókurinn með spilagaldrana og háværa hláturinn væri íslenzkur, gekk til hans drungalegur einstaklingur sem sagðist vera mjög hrifinn af Sigur Rós. Ljenzherrann játti því og bætti við að þeir væru hinir mestu myndar og sóma piltar sem væru öldruðum frænkum sínum góðir og dús jafnt við lærða sem leika menn. Leðurmennið föla sagðist þá vera sjerstaklega hrifið af ákveðnu lagi og Ljenzherrann rak í rogastanz. Ljenzherrann náði sjer þó fljótt á strik og varð kauði býsna sneyptur, er Ljenzherrann greindi frá því að í laginu væri hljómsveitin ekki að kallast á við myrkrahöfðingjann heldur að syngja um heyskap og dráttarvjelar.

Engin ummæli: