sunnudagur, 31. desember 2006

Ljenzherrann óskar íbúum jarðar gleðilegs nýs árs, sama hvar þeir búa og hvenær þeir kunni að fagna nýju ári. Á það jafnvel einnig við um batswaanawanaanaho ættfl0kkinn sem ætlar að byrja á nýju ártali í ár, en því miður fá þau engar sjerprentaðar dagbækur.

Ljenzherrann er kominn aftur til Sviss frá hraðsoðinni Íslandsför sinni. Eftir að hafa kynt íbúðina upp í nærbrókarhitastig átti hann ánægjulegt kveld með sjálfum sjer þar sem hann þreytti ýmsar frumraunir, svo sem í að sjóða hangiket og laga uppstúf, á brókinni. Hvoru tveggja gekk vonum framar. Kartöflurnar voru þó töluvert spíraðar orðnar, en ekki ljet Ljenzherrann það aftra sjer frá ánægjulegri máltið. Að henni lokinni tengdi Ljenzherrann tölvu sína við sjónvarpann og horfði á anala, jafnt íslenska sem erlenda, og skaup, í betri gæðum en margir innsveitungar íslenskir.

Flugið til Sviss gekk vonum framan, fyrir utan smávægilegt atvik þegar Ljenzherrann reyndi að sósjalisjera með því að bjóða sessunaut sínum, ungri stúlku, upp á "þrist" úr mal sínum, og þegar stúlkan hafði lýst viðbjóði sínum á þessu íslenska sælgæti reyndi Ljenzherrann að sækja móðganarfróun sína með því að tilkynna stúlkunni að gegn hæfilegri þóknun væri hann þess reiðubúinn að afhenda henni móteitrið. Ella hlyti hún kvalarfullan dauðdaga innan 36 stunda. Restin af fluginu var ákaflega vandræðaleg.

En hvað um það. Ljenzherrann fagnaði nýju ári klukkan 23:30 miðað við núllbaugstíma Greenwich, en þá voru áramót bæði á Íslandi og í Sviss, að meðaltali. Íslensk hjörtu slá þó í takt, sama hvar þau kunna að vera stödd á jarðkringlunni og fjekk Ljenzherrann því ákveðið samvizkubit að launum fyrir svik sín.

Með trega kvaddi Ljenzherrann árið 2006, en töluvert vatn rann til sjávar á því herrans ári, sem þó mun vart teljast til gullaldar þessarar vefsíðu. Ljenzherrann hlaut meðal annars batsjelorsgráðu, seldi íbúð og flutti erlendis. Ljenzherrann stje einnig niður fæti sínum í 9 löndum, sótti heim 7 höfuðborgir, ók hringinn í kring um eyjuna sína og þvældist þar að auki þónokkuð um hálendi hennar. Ef það er samt eitthvað eitt sem þetta flakk hefir kennt honum, þá er það að þrátt fyrir veðurfarið eru Íslendingar heppnir með að þekkja trúarbragðadeilur og stríð svo til af afspurninni einni.

Engin ummæli: