föstudagur, 14. júlí 2006



Ljenzherrann mun í byrjun september flytjast búferlum og hefja nám vetur komanda við Eidgenössische Technische Hochschule Zürich. Skóli þessi er meðal hinna fimm beztu í Evrópu og þar mun Ljenzherrann dveljast í góðu yfirlæti og læra þá list að temja vatn og vökva. Einnig hefur Ljenzherrann verið skipaður gestaagameistari svissneska Páfalífvarðarins og mun sinna því starfi í hjáverkum, ásamt því að smíða tilfallandi sekúnduvísa fyrir Maurice Lacroix.

Ljenzherrann horfir björtum augum á framtíðina og hlakkar til þess að hlaupa upp og niður Matterhorn, skíða í úrvalsbrekkum og þiggja rommsopa sjer til hressingar af heilögum Bernharðshundum. Hvílíkur ljettir það verður, að geta jóðlað án þess að vera litinn hornauga og að sjálfsögðu mun sælkerinn og nautnaseggurinn gera vel við sig í súkkulaði og geitaosti. Ekki er staðsetningin í hjarta Evrópu til að spilla fyrir og hyggst Ljenzherrann færa sjer það í nyt að vera ekki lengur eyjarskeggi og næra í sjer flökkueðlið til fullnustu.

Engin ummæli: